ខេត្តបន្ទាយមានជ័យ៖លោក លី សុវណ្ណារិទ្ធ អភិបាលរងខេត្តបន្ទាយមានជ័យនៅព្រឹកថ្ងៃទី៩ ខែឧសភា ឆ្នាំ២០២៤ បានអញ្ជើញជាអធិបតីភាព ក្នុងកិច្ចប្រជុំពិភាក្សាពីគម្រោងផ្តល់ជូនពិសេសនៃសេវាទូរគមនាគមន៍របស់ក្រុមហ៊ុនស្មាតអាស្យាតាខូអែលធីឌី នៅសាលាខេត្តបន្ទាយមានជ័យ។
លោក ស៊ីន ដាវ៉ាន់ដា អ្នកគ្រប់គ្រងប្រតិបត្តិការផ្នែកលក់របស់ក្រុមហ៊ុនស្មាតអាស្យាតាបានបញ្ជាក់ថា ក្រុមហ៊ុនស្មាតជាប្រតិបត្តិករទូរគមនាគមន៍ចល័តឈានមុខគេក្នុងព្រះរាជាណាចក្រកម្ពុជា ហើយបច្ចុប្បន្នក្រុមហ៊ុនបាននិងកំពុងបម្រើអតិថិជនចំនួន ៨លាននាក់ ស្ថិតនៅក្រោមស្លាកសញ្ញាស្មាត ហើយក្រុមហ៊ុនស្មាត ជាប្រតិបត្តិករដំបូងបង្អស់ដែលបានដាក់ឲ្យដំណើរការនូវសេវា បច្ចេកវិទ្យាជំនាន់ទី៤ ៤G LTE ក្នុងឆ្នាំ២០១៤ ហេីយបាននិងកំពុងផ្តល់សេវាគ្របដណ្ដប់ក្នុងតំបន់ ៩៩ភាគរយនៅទូទាំងព្រះរាជាណាចក្រកម្ពុជា។
លោក ស៊ីន ដាវ៉ាន់ដា បានបញ្ជាក់បន្ថែមថា ក្រុមហ៊ុនស្មាត មិនត្រឹមតែជាប្រតិបត្តិករទូរគមនាគមន៍ និងបច្ចេកវិទ្យាឈានមុខគេតែប៉ុណ្ណោះទេ តែបានប្ដេជ្ញាចិត្តធ្វើឲ្យមានការផ្លាស់ប្តូរដ៏ល្អមួយយ៉ាងពិតប្រាកដការប្ដេជ្ញាចិត្តរបស់ស្មាតគឺផ្ដោតលើការកសាងកេរដំណែលយូរអង្វែង។
លោក លី សុវណ្ណារិទ្ធ អភិបាលរងខេត្តបានមានប្រសាសន៍ថ្លែងអំណរគុណចំពោះក្រុមហ៊ុនស្មាតដែល ក្រុមហ៊ុនឈានមុខគេនាពេលបច្ចុប្បន្នឯរយៈកាលកន្លងមកច្រើនបានសហការជាមួយរដ្ឋបាលខេត្តបន្ទាយមានជ័យបានផ្ដោតលើគម្រោងអ៊ីនធឺណិតបញ្ចុះតម្លៃទាំងរដ្ឋបាលខេត្ដទាំងមន្ទីរបក្យ មិនតែប៉ុណ្ណោះបានផ្តល់ជូនលេខទូរស័ព្ទសម្រាប់អង្គភាពច្រកចេញចូលតែមួយរដ្ឋបាលខេត្ត។លោក លី សុវណ្ណារិទ្ធ បានបន្តទៀតថា ក្រុមហ៊ុនស្មាតជាក្រុមហ៊ុន ឈានមុខគេក៏ពិតមែនតែសម្រាប់អ្នកដែលប្រើប្រាស់នៅមានការលំបាកជាអន្លើអន្លើដូចជាការបញ្ចូលលុយមិនប្រក្រតីសេវាអ៊ីនធឺណិត Wifi មានការចាត់ចែងរអាក់រអួលល្បឿនមិនស៊ីមេទ្រី មានការរំខានធ្វើឲ្យអ្នកប្រើប្រាស់ប្រព័ន្ធស្មាតជួបបញ្ហាប្រឈមមួយចំនួនដូចជា មានបងប្អូនមួយចំនួនក្នុងបណ្ដាញសង្គមហ្វេសប៊ុកមិនសប្បាយចិត្តលើបញ្ហាបញ្ចូលលុយនិងមានការកាត់លុយដោយមិនយុត្តិធម៌ដូច្នេះសុំឲ្យក្រុមហ៊ុនស្មាតធ្វើការប្រឹងប្រែងឲ្យអស់លទ្ធភាព ដើម្បីឲ្យអតិថិជនប្រើប្រាស់ពេញចិត្តបានយូរអង្វែងនិងមានប្រសិទ្ធភាព៕
