(បន្ទាយមានជ័យ)៖ជនសង្ស័យចំនួន៤នាក់ ផឹកស៊ីក្នុងហាង«បាស្ការផាប់» ស្ថិតក្នុងភូមិផ្សារកណ្ដាល សង្កាត់ផ្សារកណ្ដាល ក្រុងប៉ោយប៉ែត បង្កជម្លោះដោយយកកែវស្រាគប់ទៅលើជនរងគ្រោះ បណ្តាលឲ្យរងរបួសធ្ងន់ ត្រូវបានដឹកបញ្ជូនទៅព្យាបាលនៅមន្ទីរពេទ្យរាជធានីភ្នំពេញ កាលពីវេលាម៉ោង០១ និង៣០នាទី ថ្ងៃទី១២ ខែមីនា ឆ្នាំ២០២៥ ត្រូវកម្លាំងជំនាញមូលដ្ឋានកងរាជអាវុធហត្ថក្រុងប៉ោយប៉ែត ចាប់ឃាត់ខ្លួន ។
លោកវរសេនីយ៍ត្រី នួន នីណារ៉ូ មេបញ្ជាការមូលដ្ឋានកងរាជអាវុធហត្ថក្រុង បានឱ្យដឹងថា ពាក់ព័ន្ធករណីខាងលើនេះ ក្រោយពីទទួលបានពាក្យបណ្ដឹងពីជនរងគ្រោះ លោកបានដឹកនាំកម្លាំងចុះ ធ្វើការស្រាវជ្រាវរហូតកំណត់មុខសញ្ញា សហការស្រាវជ្រាវជាមួយកម្លាំងកងរាជអាវុធហត្ថក្រុងសិរីសោភ័ណ រហូតដល់ថ្ងៃទី១៣ ខែមីនា ឆ្នាំ២២៥ បានធ្វើការឃាត់ខ្លួន ជនសង្ស័យជាបន្តបន្ទាប់បានចំនួន០៤នាក់ ១.ឈ្មោះប៉ាត់ ចន្ធី ភេទប្រុស អាយុ៣៣ឆ្នាំ, ២.ឈ្មោះ លៀត ចិន្តា ភេទប្រុស អាយុ៣៦ឆ្នាំ, ៣.ឈ្មោះរ៉ែន សុភ័ក្រ្ត ភេទប្រុស អាយុ៣៥ឆ្នាំ, ៤.ឈ្មោះរ៉ន រស់ ភេទប្រុស អាយុ៣៣ឆ្នាំ ហើយបញ្ជូនមកមូលដ្ឋានកងរាជអាវុធហត្ថក្រុងប៉ោយប៉ែត ដើម្បីសួរនាំតាមនីតិវិធី។
លោកវរសេនីយ៍ត្រី នួន នីណារ៉ូ បានបន្តថា ក្រោយឃាត់ខ្លួន និងសួរនាំរួច ជនសង្ស័យបានឆ្លើយសារភាពថា ពួកខ្លួនពិតបានផឹកស៊ី និងមានជម្លោះនៅក្នុងហាង ហើយបានប្រើហិង្សាយកកែវស្រាគប់ទៅលើជនរងគ្រោះ បណ្ដាលឱ្យរងរបួសពិតប្រាកដមែន។ ដោយសាក្រុមរបស់ខ្លួនអង្គុយផឹកស៊ី ជនរងគ្រោះស្រែកឡូឡា ស្រែកជេរប្រមាថមកលើក្រុមរបស់ខ្លួន។ ដោយផ្អែកលើចម្លើយសារភាព កម្លាំងមូលដ្ឋានកងរាជអាវុធហត្ថក្រុងប៉ោយប៉ែត កសាងសំណុំរឿងបញ្ជូនបន្តទៅកាន់បញ្ជាការដ្ឋានកងរាជអាវុធហត្ថខេត្ត ចាត់ការបន្តតាមនីតិវិធី។
លោកវរសេនីយ៍ទោ ព្រហ្ម ថេង ប្រធានមន្ទីរស្រាវជ្រាវនិងបង្ក្រាបបទល្មើសបានឱ្យដឹងថា ជនសង្ស័យខាងលើ ត្រូវបានកម្លាំងការិយាល័យព្រហ្មទណ្ឌ កងរាជអាវុធហត្ថខេត្ត បញ្ជូនទៅតុលាការហើយ នៅព្រឹកថ្ងៃសៅរ៍ ទី១៥ ខែមីនា ឆ្នាំ២០២៥នេះ ដើម្បីអនុវត្តតាមនីតិវិធី៕
