(បន្ទាយមានជ័យ) ផ្លូវបេតុងមួយខ្សែប្រវែង ១.១៥០ម៉ែត្រ ស្ថិតនៅក្នុងសង្កាត់អូរបិល ក្រុងសិរីសោភ័ណ ត្រូវបានលោក ខែន រិទ្ធី អភិបាលរង ក្រុង តំណាងឲ្យលោក ស្រេង សុផល អភិបាលក្រុងសេរីសោភ័ណ អញ្ជើញជាអធិបតីភាពបើកការដ្ឋានសាងសង់ជាផ្លូវការ ។ពិធីនេះបានធ្វើឡើងនៅទីតាំងខាងលិចផ្លូវទឹកស្អាត ស្ថិតនៅក្នុងភូមិរោងម៉ាស៊ីន សង្កាត់អូរអំបិល ក្រុងសិរីសោភ័ណ នៅថ្ងៃទី៥ ខែមិនា ឆ្នាំ២០២៥ ដោយមានការអញ្ជើញចូលរួមពីលោក លោកស្រីប្រធានក្រុមប្រឹក្សាក្រុង អាជ្ញាធរមូលដ្ឋានភូមិ សង្កាត់ និងក្រុមយុវជន ស.ស.យ.ក. និងប្រជាពលរដ្ឋយ៉ាងច្រើនកុះករផងដែរ។
លោកស្រីចៅសង្កាត់អូរអំបិល បានមានមតិលើកឡើងថា៖ អ្វីដែលបងប្អូន កូន ក្មួយ ពុក ម៉ែ ទន្ទឹងរង់ចាំបានមកដល់ហើយនៅផ្លូវបេតុងមួយខ្សែប្រវែង ១.១៥០ម៉ែត្រ ដែលមានទទឹង ៥ម៉ែត្រ និងមានកំរាស់១ទឹកកន្លះ ដែលជាគម្រោងថវិការបស់សង្កាត់ និងទទួលម៉ៅការដោយក្រុមហ៊ុនលោក ហួត សំ (ក្រុមហ៊ុនឌីភាច) ហើយសម្រាប់បងប្អូនប្រជាពលរដ្ឋទាំង២ភូមិគឺភូមិរោងម៉ាស៊ីន និងភូមិអូរអំបិល ដែលធ្វើដំណើរឆ្លងកាត់ទៅមកនៅលើផ្លូវនោះមានសរុបប្រមាណជាង ២.០០០គ្រួសារ។
លោក ខែន រិទ្ធី អភិបាលរង ក្រុងសិរីសោភ័ណ បានមានប្រសាសន៍លើកឡើងថា៖ ក្រោមការដឹកនាំដោយសម្ដេចបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ដែលជាអ្នកបន្តវេនពីសម្ដេចតេជោ ហ៊ុន សែន សូមឱ្យបងប្អូនប្រជាពលរដ្ឋទូទាំងប្រទេស ក៏ដូចជាលោកយាយ លោកតា បងប្អូន កូនក្មួយ ទាំងអស់ត្រូវមានជំនឿលើសម្ដេច ក្នុងការអភិវឌ្ឍន៍ និងការកសាងហេដ្ឋារចនាសម្ព័ន្ធ ដែលស្របទៅតាមគោលការណ៍របស់រាជរដ្ឋាភិបាលគឺអនុវត្តន៍គោលការណ៍បញ្ចកោណ ការកសាងហេដ្ឋារចនាសម្ព័ន្ធ គឺអភិវឌ្ឍន៍ការងារជនបទ ពីផ្លូវដី ផ្លូវគ្រោះក្រហម ទៅជាផ្លូវបេតុង ផ្លូវកៅស៊ូ ជាបន្តបន្ទាប់ ដើម្បីឲ្យបងប្អូនប្រជាពលរដ្ឋទូទាំងប្រទេសបានប្រើប្រាស់ នៅសមិទ្ធផលរបស់រាជរដ្ឋាភិបាល។
ទន្ទឹមជាមួយគ្នានោះលោក ខែន រិទ្ធី បានធ្វើការសំណូមពរដល់បងប្អូនប្រជាពលរដ្ឋដែលរស់នៅទាំង២ភូមិ សូមចូលរួមសហការជាមួយអាជ្ញាធរមូលដ្ឋាន និងក្រុមហ៊ុនម៉ៅការសាងសង់ធ្វើផ្លូវ ដើម្បីងាយស្រួលដល់ក្រុមការងារយើងចុះអនុវត្តសាងសង់ផ្លូវជូនបានឆាប់រហ័ស។ជាពិសេស ត្រូវចូលរួមថែរក្សាសមិទ្ធផលដែលមានស្រាប់ និងចូលរួមថែរក្សាសុខសន្តិភាពបន្តទៀតផងដែរ៕
