ខេត្តបន្ទាយមានជ័យ៖ ដើម្បីពង្រឹងកិច្ចសហប្រតិបត្តិការមហាមិត្តដែកថែបរវាងកម្ពុជា–ចិន ឱ្យកាន់តែមានភាពស្និតស្នាលនោះ នាចុងសប្តាហ៍នេះរដ្ឋបាលខេត្តបន្ទាយមានជ័យ បានជំនួបសម្ដែងការគួរសម និងពិភាក្សាការងារជាមួយប្រតិភូចិនដឹកនាំដោយ ឯកឧត្តម លាវ ចុងយី ឧបការីរដ្ឋមន្ត្រីក្រសួងសន្តិសុខសាធារណៈចិន ក្នុងគោលបំណងយើងរួមគ្នា ប្រយុទ្ធប្រឆាំង ឧក្រិដ្ឋកម្មឆ្លងដែន និងអំពើឆបោកតាមប្រព័ន្ធអនឡាញ។
ឯកឧត្តម អ៊ុំ រាត្រី អភិបាល នៃគណៈអភិបាលខេត្តបន្ទាយមានជ័យបានមានប្រសាសន៍ថា សភាពការណ៍សន្តិសុខ សណ្ដាប់ធ្នាប់សាធារណៈ និងរបៀបរៀបរយសង្គមទាំងផ្ទៃក្នុងខេត្ត និងតាមតំបន់ព្រំដែនជាទូទៅមានលក្ខណៈល្អប្រសើរ សន្តិសុខតាមខ្សែបន្ទាត់ព្រំដែនខេត្ត រក្សាបាននូវបូរណភាព និងអធិបតេយ្យភាពជាតិ ព្រមទាំងប្រែក្លាយតំបន់ព្រំដែនជាព្រំដែនសន្តិភាព សេដ្ឋកិច្ច ពាណិជ្ជកម្ម ឧស្សាហកម្ម និងទេសចរណ៍។ កន្លងមកក៏ដូចបច្ចុប្បន្ន រដ្ឋបាលខេត្ត មានកិច្ចសហការគ្នាយ៉ាងល្អជាមួយ រដ្ឋបាលខេត្តស្រះកែវ នៃប្រទេសថៃ តាមរយៈការជួបប្រជុំប្រចាំឆ្នាំ ប្រចាំខែ ឬការងារបន្ទាន់ភ្លាមៗរវាងរដ្ឋបាល និងកងកម្លាំងឈរជើងការពារនៅតាមព្រំដែន ដើម្បីពង្រឹងកិច្ចសហការល្អជាមួយគ្នា ក្នុងការទប់ស្កាត់រាល់បទល្មើសឆ្លងដែនផ្សេងៗបានយ៉ាងល្អប្រសើរ។
ទន្ទឹមនឹងកត្តាសន្តិសុខខាងលើនេះបច្ចុប្បន្ន មានជនបរទេសមិនមែនអន្តោប្រវេសន្ត កំពុងស្នាក់នៅ និងប្រកបមុខរបរធុរកិច្ចផ្សេងៗដូចជា បើកក្រុមហ៊ុន រោងចក្រ សណ្ឋាគារ កាស៊ីណូ លក់ទំនិញ។ មានមនុស្សចំនួនប្រមាណជា ១៦,១៥២នាក់ ស្រី ៤,០៨៦នាក់ ថ្នាក់នៅតាមរយៈចុះក្នុងប្រព័ន្ធ FPCS មាន ៧សញ្ជាតិ ក្រៅពីនេះមានភ្ញៀវទេសចរចិនស្នាក់នៅក្នុងខេត្តប្រមាណជា ១,២៤៧នាក់។
ឯកឧត្តម លាវ ចុងយី ឧបការីរដ្ឋមន្ត្រីក្រសួងសន្តិសុខសាធារណៈចិន បានមានប្រសាសន៍ថ្លែងនូវអំណរគុណចំពោះរដ្ឋបាលខេត្តបន្ទាយមានជ័យ ដែលបានអនុញ្ញាតឱ្យក្រុមប្រតិភូចិន ចូលរួមពិភាក្សាការងារមួយចំនួនដូចជា បញ្ហាសន្តិសុខ សេដ្ឋកិច្ច ជាពិសេសបញ្ហាឧក្រិដ្ឋកម្មឆ្លងដែនអន្តោប្រវេសន្តដោយខុសច្បាប់ និងអំពើឆបោកតាមប្រព័ន្ធអនឡាញ ក្នុងនោះរួមមានជនជាតិចិនមួយចំនួនផងដែរ។
ឯកឧត្តម លាវ ចុងយី បានបន្តថា ការជួបសម្ដែងការគួរសមនិងពិភាក្សាគ្នានាថ្ងៃនេះ គឺក្នុងគោលបំណង ពង្រឹងទំនាក់ទំនងសហប្រតិបត្តិការកម្ពុជា.ចិន ឱ្យកាន់តែល្អប្រសើរ សំខាន់ត្រូវធ្វើការសហការគ្នាក្នុងការប្រយុទ្ធប្រឆាំងការឆបោកតាមអនឡាញ ឧក្រិដ្ឋកម្មឆ្លងដែនខុសច្បាប់ យើងរួមគ្នាត្រូវធ្វើការក្ដាប់ឲ្យបានមុខសញ្ញាទីតាំងឆបោក និងការចាប់ជុំរិត។ ជាការឆ្លើយតបឯកឧត្តម អ៊ុំ រាត្រី ក៏បានទទួលនិងសំណូមពរពីគណៈប្រតិភូចិន ចំពោះការសហការប្រយុទ្ធប្រឆាំងបទល្មើសផ្សេងៗ នៅក្នុងតំបន់គោលដៅ ពិសេសមុខសញ្ញាតំបន់ក្រុងប៉ោយប៉ែតធ្វើយ៉ាងណា យើងពិនិត្យគ្រប់គ្រងឲ្យបានម៉ត់ចត់បំផុត ជាក់ស្ដែងកន្លងទៅថ្មីៗនេះ សមត្ថកិច្ចយើងបានធ្វើការឃាត់ខ្លួនជនឆបោកចំនួន ២៣០នាក់ នៅក្នុងក្រុងប៉ោយប៉ែត៕
