ខេត្តបន្ទាយមានជ័យ៖ជនជាតិថៃ ចំនួន១១៩នាក់ ស្រី៥៨នាក់ ត្រូវបាននគរបាលប៉ុស្តិ៍ច្រកទ្វាព្រំដែនអន្តរជាតិប៉ោយប៉ែត សហការជាមួយកម្លាំងស្នាក់ការត្រៀមបណ្ដេញចេញខេត្តសៀមរាប នៃនាយកដ្ឋានស៊ើបអង្កេតនិងអនុវត្តនីតិវិធី រួមនិងសមត្ថកិច្ចពាក់ព័ន្ធជាច្រើនរូប បានធ្វើការប្រគល់-ទទួល និងបញ្ជូនចេញ
ទៅប្រទសកំណើតវិញតាមច្រកព្រំដែនអន្តរជាតិប៉ោយប៉ែតនាព្រឹកថ្ងៃទី០១ ខែមីនា ឆ្នាំ២០២៥ ក្រោយពីឃាត់ខ្លួនពាក់ព័ន្ធករណីលួចឆ្លងដែន ស្នាក់នៅធ្វើការដោយខុសច្បាប់នៅក្នុងប្រទេសកម្ពុជា។
ការប្រគល់-ទទួល និងបញ្ជូនចេញនេះក្រោមការដឹកនាំដោយលោកឧត្តមសេនីយ៍ទោ យឿម ម៉ាន់ អនុប្រធាននាយកដ្ឋានស៊ើបអង្កេតនិងអនុវត្តនីតិវិធី និងលោកឧត្តមសេនីយ៍ត្រី អេង លីហួរ ស្នងការរង ផែនការងារអន្តោប្រវេសន៍ តំណាងលោកឧត្តមសេនីយ៍ទោ សិទ្ធិ ឡោះ ស្នងការនៃស្នងការដ្ឋាននគរបាលខេត្តបន្ទាយមានជ័យ និងមានការចូលរួមពីកម្លាំងអធិការដ្ឋាននគរបាលក្រុងប៉ោយប៉ែតផងដែរ។
ជនជាតិថៃប្រុស-ស្រីទាំងនេះ ត្រូវបាននគរបាលឃាត់ខ្លួនពាក់ព័ន្ធបទល្មើសលួចស្នាក់នៅធ្វើការងារខុសច្បាប់ និងគ្មានលិខិតឆ្លងដែន កាលពីថ្ងៃ២២ និង២៣ ខែកុម្ភៈ ឆ្នាំ២០២៥ ។
សូមបញ្ជាក់ផងដែរថា ពិធីប្រគល់ទទួលឲ្យភាគីថៃ ធ្វើឡើងលើស្ពានមិត្តភាពកម្ពុជា-ថៃ នៅច្រកទ្វារអន្តរជាតិប៉ោយប៉ែត ខេត្តបន្ទាយមានជ័យ ប្រទេសកម្ពុជា ខាងថៃច្រកក្លងលឹក ស្រុកអារញ្ញ ខេត្តស្រះកែវ ប្រទេសថៃ ៕
