ខេត្តបន្ទាយមានជ័យ៖ឯកឧត្តម ប្លែក វ៉ារី ប្រធានក្រុមប្រឹក្សា ខេត្តបន្ទាយមានជ័យ ឯកឧត្តម អ៊ុំ រាត្រី អភិបាលខេត្ត នាព្រឹកថ្ងៃទី២៨ ខែកុម្ភៈ ឆ្នាំ២០២៥ បានអញ្ជើញអធិបតីក្នុងពិធីប្រកាសចូលកាន់មុខដំណែង អភិបាលនៃគណៈអភិបាលស្រុព្រះនេត្រព្រះ ដោយលោក ហឿន វីរៈ ត្រូវបានប្រកាសឲ្យចូលកាន់មុខតំណែងជាអភិបាលស្រុព្រះនេត្រព្រះ ជំនួសលោក ឃូ ពៅ ត្រូវបានផ្ទេរតំណែងជាអភិបាល រងខេត្តបន្ទាយមានជ័យ។
លោក ហឿន វីរៈ ក្រោយពេលទទួលបានការតែងតាំងពីរាជរដ្ឋាភិបាលកម្ពុជា រួចមក បានឡើងប្តេជ្ញាចិត្តថា លោកនឹងគោរព គាំទ្រ និងចូលរួមអនុវត្តឲ្យបានខ្ជាប់ខ្ជួន នូវកម្មវិធីគោលនយោបាយ និងយុទ្ធសាស្ត្របញ្ចកោណ ដំណាក់កាលទី១ នៃនីតិកាលទី៧ នៃរដ្ឋសភា របស់រាជរដ្ឋាភិបាល ក្រោមការដឹកនាំរបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ដ្រី នៃព្រះរាជាណាចក្រកម្ពុជា។ប្តេជ្ញាចូលរួមកម្លាំង ក្នុងការជម្រុញការអនុវត្តគោលនយោបាយភូមិ ឃុំ មានសុវត្ថិភាពឲ្យ កាន់តែមានប្រសិទ្ធភាពខ្ពស់ ដើម្បីបន្តការរក្សាសន្តិសុខ សណ្តាប់ធ្នាប់សង្គម រក្សាស្ថេរភាពនយោបាយ និងភាពសុខដុមនីយកម្មជូនប្រជាពលរដ្ឋឲ្យកាន់តែល្អប្រសើរថែមទៀត និងយកចិត្តទុកដាក់អនុវត្តគោលនយោបាយ កំណែទម្រង់តាមបែបវិមជ្ឈការនិងវិសហមជ្ឈការ ។ខិតខំបំរើការងារក្នុងរដ្ឋបាលស្រុកព្រះនេត្រព្រះ និងប្រជាពលរដ្ឋឲ្យបានល្អប្រសើរ ព្រមទាំងពង្រឹងសាមគ្គីភាពផ្ទៃក្នុងរដ្ឋបាលស្រុក គោរពរដ្ឋធម្មនុញ លិខិតបទដ្ឋានគតិយុទ្ធនានា យកប្រយោជន៍ជាតិជាធំ ចូលរួមថែរក្សាការពារអធិបតេយ្យភាព បូរណភាពទឹកដី ការពារសន្តិភាព ស្ថេរភាពនយោបាយ សណ្តាប់ធ្នាប់សាធារណៈជាដើម ។
ឯកឧត្តម អ៊ុំ រាត្រី អភិបាលខេត្តបន្ទាយមានជ័យបានថ្លែងថា លោក ហឿន វីរៈ ប្រកាសចូលកាន់មុខដំណែង ជាអភិបាលស្រុកព្រះនេត្រព្រះនេះ មានតួនាទីសំខាន់ណាស់ក្នុងការបំពេញតួនាទីភារកិច្ចរបស់ខ្លួនដើម្បីឆ្លើយតប លើកិច្ចការងាររបស់រដ្ឋបាលស្រុកព្រះនេត្រព្រះ ដើម្បីសង្គមនិងជួយដល់ប្រជាពលរដ្ឋក្នុងស្រុក ព្រះនេត្រព្រះ ដែលមានទុក្ខលំបាកចូលរួមដោះស្រាយឲ្យបានទាន់ពេលវេលា ដោយមិនប្រកាន់បក្ខពួក សាសនាឬនិន្នាការនយោបាយឡើយ ។
ឯកឧត្តម បន្តថា ក្នុងរាជរដ្ឋាភិបាលនីតិកាលទី៧ នៃរដ្ឋសភា បានបង្ហាញ ពីការប្តេជ្ញាចិត្តយ៉ាងមុតមាំក្នុងការអនុវត្តយុទ្ធសាស្ត្របញ្ចកោណ ដែលស្នូល នៃយុទ្ធសាស្ត្រនេះគឺ ផ្តោតលើការកែទម្រង់ និងការពង្រឹងអភិបាលកិច្ច និងការធ្វើទំនើបកម្មស្ថាប័នរដ្ឋឲ្យក្លាយជារដ្ឋបាលសាធារណៈទំនើប ប្រកប ដោយសមត្ថភាពខ្ពស់ខ្លាំង វៃឆ្លាត និងស្អាតស្អំ។
ឆ្លៀតក្នុងឱកាសនោះឯកឧត្តមក៏បានថ្លែងនូវការកោតសរសើរ និងវាយតម្លៃខ្ពស់ ចំពោះរដ្ឋបាលក្រុង ស្រុក លោកលោកស្រី មន្ត្រីរាជការ ដែលកន្លងមកបានខិតខំប្រឹងប្រែងរួមគ្នាយ៉ាងសកម្មក្នុងការបំពេញតួនាទី ភារកិច្ចប្រកបដោយស្មារតីទទួលខុសត្រូវខ្ពស់ កែលំអសេវារដ្ឋបាលសាធារណៈ
ឲ្យកាន់តែមានភាពល្អប្រសើរជាងមុន ខិតខំយកចិត្តទុកដាក់អនុវត្តគោលនយោបាយ“ភូមិ ឃុំ សង្កាត់មានសុវត្ថិភាព» ដើម្បីសម្រេចបាននូវសមិទ្ធផលក្នុងការធានាថែរក្សាសន្តិភាព ស្ថិរភាពនយោបាយ សន្តិសុខ សណ្តាប់ធ្នាប់សាធារណៈ លើកកម្ពស់លទ្ធិប្រជាធិបតេយ្យ និងជំរុញការ
អភិវឌ្ឍសេដ្ឋកិច្ចសង្គម ស្របតាមគោលនយោបាយរបស់រាជរដ្ឋាភិបាល សំដៅលើកកម្ពស់ជីវភាពរស់នៅ និងការបន្តកាត់បន្ថយភាពក្រីក្ររបស់ប្រជាពលរដ្ឋ៕
