(បន្ទាយមានជ័យ)៖ កម្លាំងមូលដ្ឋានកងរាជអាវុធហត្ថក្រុងសិរីសោភ័ណទទួលពាក្យបណ្ដឹងពីឈ្មោះ ជួន ស្រីខួច ភេទស្រី អាយុ៤២ឆ្នាំ មានទីលំនៅភូមិកំពង់ស្វាយ សង្កាត់កំពង់ស្វាយ ក្រុងសិរីសោភ័ណ ខេត្តបន្ទាយមានជ័យ បានប្ដឹងចោទប្រកាន់លើឈ្មោះ លី លេង (ហៅង៉ា) ភេទប្រុស អាយុ៤១ឆ្នាំ ត្រូវជាប្ដី ពីបទៈហិង្សាប្រព្រឹត្តដោយសហព័ទ្ធ និងលួចទ្រព្យសម្បត្តិក្នុងផ្ទះ កាលពីថ្ងៃទី១៧ ខែកុម្ភះ ឆ្នាំ២០២៥។ ក្រោយពីទទួលបានពាក្យបណ្ដឹង កម្លាំងជំនាញរបស់មូលដ្ឋានកងរាជអាវុធហត្ថក្រុងសិរីសោភ័ណ ដឹកនាំដោយលោកវរសេនីយ៍ត្រី សុខ ឡេង មេបញ្ជាការមូលដ្ឋានកងរាជអាវុធហត្ថក្រុង បានចុះស្រាវជ្រាវ និងឃាត់ខ្លួនជនសង្ស័យនៅចំណុចភូមិ៣ សង្កាត់ព្រះពន្លា ក្រុងសិរីសោភ័ណ ហើយនាំមកកាន់មូលដ្ឋានកងរាជអាវុធហត្ថក្រុងសិរីសោភ័ណ ដើម្បីសួរនាំតាមនីតិវិធី ។
លោកវរសេនីយ៍ត្រី សុខ ឡេង មេបញ្ជាការមូលដ្ឋានកងរាជអាវុធហត្ថក្រុងបានឱ្យដឹងថា ក្រោយឃាត់ខ្លួន និងសួរនាំរួច ជនសង្ស័យបានឆ្លើយសារភាពថា រូបគេនិងជនរងគ្រោះគឺជាប្តីប្រពន្ធនិងគ្នាជាង២៤ឆ្នាំមកហើយ។ ដោយកាលពីឆ្នាំ២០២២ រូបគេមានជម្ងឺក្រលៀន និងប្ដូរក្រលៀននៅប្រទេសឥណ្ឌា មិនអាចធ្វើការងារធ្ងន់បាន ហើយរូបខ្លួនខឹងនឹងប្រពន្ធនិយាយបែបមើលងាយជារ៉ើយៗផង ខ្លួនក៏មានទំនាក់ទំនងស្នេហាជាមួយកូនចៅធ្វើការជាមួយប្រពន្ធរបស់ខ្លួនពិតប្រាកដមែន។ ហើយខ្លួនតែងតែមានបញ្ហាឈ្លោះប្រកែកគ្នាជាមួយប្រពន្ធជាជាញឹកញាប់។ ទើបនៅថ្ងៃទី១៥ ខែកុម្ភៈ ឆ្នាំ២០២៥ រូបគេផឹកស្រាស្រវឹងក៏បានទាស់ពាក្យសម្ដីជាមួយប្រពន្ធក៏បានវាយប្រតាយប្រតប់គ្នាបណ្ដាលឱ្យមានរបួសស្នាមដល់ជនរងគ្រោះជាប្រពន្ធតែតែម្តង។ ដោយផ្អែកលើបណ្ដឹង និងចម្លើយសារភាព កម្លាំងមូលដ្ឋានកងរាជអាវុធហត្ថក្រុងកសាងសំណុំរឿងបញ្ជូនទៅកាន់បញ្ជាការដ្ឋានកងរាជអាវុធហត្ថខេត្តចាត់ការបន្តតាមនីតិវិធី។
លោកវរសេនីយ៍ទោ ព្រហ្ម ថេង ប្រធានមន្ទីរស្រាវជ្រាវនិងបង្ក្រាបបទល្មើសបានឱ្យដឹងថា បច្ចុប្បន្ន ជនសង្ស័យត្រូវបានកម្លាំងការិយាល័យព្រហ្មទណ្ឌ កងរាជអាវុធហត្ថខេត្តបញ្ជូនទៅតុលាការហើយ នៅរសៀលថ្ងៃពុធ ទី១៩ ខែកុម្ភៈ ឆ្នាំ២០២៥នេះ ដើម្បីអនុវត្តតាមនីតិវិធី៕
