ខេត្តបន្ទាយមានជ័យ៖ អគ្គីភ័យឆាបឆេះម៉ាស៊ីនត្រជាក់នៅក្លឹប ឈ្មោះថា “ស៊ីនជាន់ ហួយ ខេធីវី” (EDM ចាស់) ស្ថិតនៅក្នុងភូមិសាមគ្គីមានជ័យ សង្កាត់អូរជ្រៅ ក្រុងប៉ោយប៉ែត ខេត្តបន្ទាយមានជ័យ បង្ករការភ្ញាក់ផ្អើលនាព្រឹកព្រលឹមថ្ងៃទី១៩ ខែកុម្ភៈ ឆ្នាំ២០២៥ ។ក្រោយពីទទួលបានព័ត៌មាននេះភ្លាមកម្លាំងនគរបាលក្រុងប៉ោយប៉ែត សហការជាមួយកម្លាំងកងរាជអាវុធហត្ថក្រុង កម្លាំងយោធា ក្រុមសង្គ្រោះបឋមក្រុង រួមនឹងអាជ្ញាធរមូលដ្ឋាន បាននាំយករថយន្តពន្លត់អគ្គីភ័យ ចុះជួយអន្តរាគមន៍រហូតគ្រប់គ្រងស្ថានការណ៍បាន មិនបង្កឲ្យឆេះរាលដាលចូលដល់ក្នុងខេធីវី នោះឡើយ ពោលគឺឆេះតែម៉ាស៊ីនត្រជាក់នៅខាងក្រៅ ktv តែប៉ុណ្ណោះ ។
ក្នុងរង្វង់ប្រតិបត្តិការចុះជួយអន្តរាគមន៍ក្នុងគ្រោះអគ្គីភ័យនេះដែរ កម្លាំងសមត្ថកិច្ចបានប្រើប្រាស់រថយន្តចំនួន៥ គ្រឿង របស់អធិការដ្ឋាននគរបាលក្រុង, កាស៊ីណូ និងរបស់ក្រុមសង្គ្រោះបឋមក្រុង តែប្រើប្រាស់ទឹកអស់ចំនួនពីរគ្រឿង ទើបរលត់ជាស្ថាពរមិនបណ្ដាលឲ្យឆេះរាលដាលដល់ខាងក្នុង ktv ក៏ដូចជាមិនមានមនុស្សណាម្នាក់គោះថ្នាក់នោះឡើយ។
គួរបញ្ជាក់ផងដែរថា ចាប់តាំងពីរចូលឆ្នាំប្រពៃណីជនជាតិចិន–វៀតណាម មកឃើញថា គ្រោះអគ្គីភ័យបានកើតឡើងជាបន្តបន្ទាប់ប៉ុន្តែមិនបណ្ដាលឲ្យខូចខាតទ្រព្យសម្បត្តិធ្ងន់ធ្ងរ និងមិនបណ្ដាលឲ្យមនុស្សណាម្នាក់រងគ្រោះថ្នាក់នោះឡើយ ដោយការយកចិត្តទុកដាក់ និងត្រៀមអន្តរាគមន៍រួចជាស្រេចរបស់កងកម្លាំងសមត្ថកិច្ចនិងអាជ្ញាធរមូលដ្ឋាន តែទោះជាយ៉ាងណាក្តីសមត្ថកិច្ចនិងអាជ្ញាធរ នូវតែបន្តអំពាវនាវដល់បងប្អូនប្រជាពលរដ្ឋឲ្យមានការប្រុងប្រយ័ត្នខ្ពស់៕
