បន្ទាយមានជ័យ៖ ក្មេងទំនើង២នាក់ជិះម៉ូតូ១គ្រឿងយកដំបងវ៉ៃយុវជន២នាក់ បងប្អូនរបួសធ្ងន់ម្នាក់ ស្រាលម្នាក់ ហេតុការណ៍នេះកើតឡើង យប់ថ្ងៃទី១៦ ខែធ្នូ ឆ្នាំ២០២៤ នៅចំណុចស្តប់ផ្សារកណ្តាល ភូមិផ្សារកណ្តាល សង្កាត់ផ្សារកណ្តាល ក្រុងប៉ោយប៉ែត ខេត្តបន្ទាយមានជ័យ។
អ្នកឃើញហេតុការណ៍បានប្រាប់ថា៖ នៅពេលកើតហេតុ គេឃើញជនរងគ្រោះ២នាក់បងប្អូន ជិះម៉ូតូមកពីដើរលេងដល់ផ្លូវបត់ចូលផ្ទះវិញ ត្រូវក្មេងទំនើង១ក្រុម មាន២នាក់ ជិះម៉ូតូ១គ្រឿងកាន់ដំបងដែកទីប វាយទៅលើអ្នកបើកបរចំកញ្ជាំងក បណ្តាលឲ្យដួលម៉ូតូ ហើយចុះវាយថែមទៀត បណ្តាលឲ្យជនរងគ្រោះអ្នកបើកបរសន្លប់រងរបួសធ្ងន់ ត្រូវក្រុមសង្គ្រោះបឋមដឹកយកទៅព្យាបាលនៅមន្ទីរពេទ្យបង្អែកប៉ោយប៉ែត ចំណែកម្នាក់ទៀតរងរបួសស្រាល។
អ្នកឃើញហេតុការណ៍បានបន្តថា៖ នៅពេលដែលឃើញក្មេងទំនើងវាយគ្នា អ្នកជិតខាងស្រែកឆោឡោ បង្អើលទើបក្មេងទំនើងជិះម៉ូតូរត់គេចតែម្តង។ តែភ្លាមៗនោះ ឃើញសមត្ថកិច្ចមកដល់ហើយជិះម៉ូតូតាមចាប់ពីក្រោយ តែចាប់មិនបាន។
កម្លាំងប៉ុស្តិ៍នគរបាលផ្សារកណ្តាលប្រាប់ថា៖ ករណីក្មេងទំនើងវ៉ៃទៅលើយុវជន២នាក់បងប្អូន កម្លាំងជំនាញកំពុងធ្វើការស្រាវជ្រាវ ចាប់ដើម្បីមានវិធានការតាមច្បាប់ ហើយករណីអាចជារឿងគំនុំទើបតាមវ៉ៃដល់មុខផ្ទះ៕
