ខេត្តកណ្តាល៖ឧបទ្ទវហេតុគ្រោះថ្នាក់ចរាចរណ៍រវាងម៉ូតូនិងម៉ូតូ បណ្តាលឲ្យមនុស្សម្នាក់ស្លាប់ ពេលបញ្ជូនទៅដល់មន្ទីរពេទ្យ និងមនុស្សប្រុសស្រី០៣នាក់ផ្សេងទៀតរងរបួសធ្ងន់ស្រាល រីឯម៉ូតូរងការខូចខាតទាំង០២គ្រឿង។ហេតុការណ៍នេះបានកើតឡើងកាលពីវេលាម៉ោង ២០និង០០នាទីថ្ងៃទី២៨ ខែតុលា ឆ្នាំ២០២៤ នៅចំណុចលើផ្លូវបេតុង ស្ថិតក្នុងភូមិ អរិយក្សត្រ សង្កាត់/ក្រុងអរិយក្សត្រ ខេត្តកណ្តាល។
លោកវរសេនីយ៏ទោ រស់ ដាលីន អធិការនគរបាលក្រុងអរិយក្សត្រ បានឲ្យដឹងថា មុនពេលកើតហេតុមានម៉ូតូ០១គ្រឿង HONDA Scoopy ពណ៌ ស លាយ ទឹកក្រូច ពាក់ស្លាកលេខភ្នំពេញ1KW-5802 បើកបរដោយឈ្មោះ ពៅ ស្រីពេជ្រ ភេទស្រី អាយុ ៣៤ឆ្នាំ មានទីលំនៅភូមិបារាជ សង្កាត់ ស្វាយជ្រំ ក្រុងអរិយក្សត្រ ខេត្តកណ្តាល (របួសស្រាល) និងអ្នករួមដំណើរ០១នាក់ ឈ្មោះ ទ្រី សុវិចិត្រា ភេទប្រុសអាយុ ១៤ឆ្នាំ មានទីលំនៅភូមិឃុំជាមួយគ្នា (របួសធ្ងន់នៅពេលបញ្ជូនដល់មន្ទីពេទ្យភ្នំពេញបានស្លាប់) បើកបរពីលិច ទៅកើត លុះមកដល់កន្លែងកើតហេតុក៏បានបត់ឆ្វេងនៅលើទ្រូងផ្លូវស្របពេលនោះក៏មានម៉ូតូមួយគ្រឿងម៉ាក Honda Dream C125 ពណ៌ ខ្មៅ ពាក់ស្លាកលេខ ពោធិសាត់1N-2135 ដែលកំពុងបើកបរក្នុងទិសដៅស្របគ្នាបានបុកចំពាក់កណ្តាលតែម្តង ។អ្នកបើកបរឈ្មោះ អ៊ុក មករា ភេទប្រុស អាយុ ១៩ឆ្នាំ (របួសធ្ងន់)មានទីលំនៅភូមិខ្សាច់ សង្កាត់អរិយក្សត្រ ក្រុងអរិយក្សត្រ ខេត្តកណ្តាល និងអ្នករួមដំណើរចំនួន០១នាក់ ឈ្មោះ វឿង សុខម៉េង ភេទប្រុស អាយុ១៧ ឆ្នាំ (របួសស្រាល) មានទីលំនៅភូមិសង្កាត់ជាមួយគ្នា ។
លោកបញ្ជាក់ថា ក្រោយពីកម្លាំងជំនាញធ្វើការវាស់វែងរួច មធ្យោបាយដែលពាក់ព័ន្ធ ត្រូវបានយកមករក្សាទុកបណ្តោះអាសន្ននៅប៉ុស្តិ៍នគរបាលរដ្ឋបាលអរិយក្សត្រ ដើម្បីបន្តចាត់ការតាមនិតីវិធី ។ចំណែកសព បានប្រគល់ឲ្យសាច់ញាតិយកទៅធ្វើបុណ្យតាមប្រពៃណី៕
