(បន្ទាយមានជ័យ)៖យើងទាំងអស់គ្នា អាចនឹងភ្លេចមេរោគអេដស៍ ជំងឺអេដស៍ ក៏ប៉ុន្តែមេរោគអេដស៍និងជំងឺអេដស៍មិនអាច ភ្លេចយើងនោះទេ ។ឯកឧត្តម យុត ស្វីត នី ហេរញ្ញិក គណៈកម្មាធិការសាខាកាកបាទក្រហមខេត្តបន្ទាយមានជ័យតំណាង ឯកឧត្តម អ៊ុំ រាត្រី ប្រធានគណៈកម្មាធិការសាខាកាកបាទក្រហមខេត្ត មានប្រសាសន៍បែបនេះក្នុងសិក្ខាសាលាចែករំលែកបទពិសោធន៍ស្ដីពីការអនុវត្តការងារគម្រោងលើកកម្ពស់ការទទួលបាន ការព្យាបាល និងថែទាំជន ចំណាកស្រុក ដែលរស់នៅជាមួយមេរោគអេដស៍ ជំងឺអេដស៍ក្នុងអនុតំបន់ទន្លេមេគង្គ នាព្រឹកថ្ងៃទី៧ ខែសីហា ឆ្នាំ២០២៤ នៅទីស្នាក់ការសាខាកាកបាទក្រហមខេត្តបន្ទាយមានជ័យ ដែលមានសិក្ខាកាម ចូលរួម ជាអ្នកស្ម័គ្រចិត្តមកពីខេត្តបន្ទាយមានជ័យ និងអ្នកស្ម័គ្រចិត្តមកពីខេត្តប៉ៃលិនសរុបចំនួន៤៩នាក់។
លោកបណ្ឌិត វ៉ា សុភ័ក្រ ប្រធានការិយាល័យជំងឺឆ្លងនិងមិនឆ្លងនៃនាយកដ្ឋានសុខភាពរបស់កាកបាទក្រហមកម្ពុជា និងឯកឧត្ដម យុត ស្វីតនី ហិរញ្ញក គណៈកម្មាធិការសាខាកាកបាទក្រហមខេត្តបានមានប្រសាសន៍លើកឡើងថា អង្គសិក្ខាសាលានាពេលនេះ ពិតមែនតែមានរយៈពេលខ្លី ក៏ប៉ុន្តែប្រធានបទ ដែកមាននៅក្នុងកម្មវិធីនេះ ពិតជាមានសារៈសំខាន់ ពិសេសពាក់ព័ន្ធនឹងជនចំណាកស្រុកដែលរស់នៅជាមួយមេរោគអេដស៍និងជំងឺអេដស៍ ដើម្បីគាំទ្រ ចូលរួមការពារ និងកាត់បន្ថយអត្រាឆ្លងមេរោគអេដស៍ជំងឺអេដស៍និងការចំណាកស្រុកប្រកបដោយសុវត្ថិភាព ដែលបានអនុវត្តនាពេលកន្លងមក ដើម្បីជាការឆ្លុះបញ្ចាំង និងដកបទពិសោធចំណុចល្អៗ។
ឯកឧត្តមបានបន្តថា អង្គសិក្ខាសាលា នេះមានគោលបំណងដើម្បីដកស្រង់បទពិសោធន៍ រៀនសូត្រពីគ្នាទៅវិញទៅមក និងផ្តល់ព័ត៌មានត្រឡប់មកក្នុងការអនុវត្តសកម្មភាពគម្រោងព្រមទាំង បន្តធានានិរន្តរភាពការងារគម្រោងឆ្ពោះទៅបង្កើតនូវការទទួលបាននូវសេវាព្យាបាល និងថែទាំដល់ប្រជាពលរដ្ឋចំណាកស្រុកផ្ទុកមេរោគអេដស៍និងរួមចំណែកជាមួយរាជរដ្ឋាភិបាល ក្នុងការឈានឆ្ពោះទៅសម្រេចបានទិសដៅបញ្ចប់ អេដស៍ ដែលជាការគំរាមដល់ សុខភាពសាធារណៈនៅឆ្នាំ២០២៥។ ដូចនេះ លោក លោកស្រីដែលជាអ្នកស្ម័គ្រចិត្ត គម្រោង ពលរដ្ឋគ្រប់រូបត្រូវចេះពីវិធីការពារ និងកាត់បន្ថយអត្រាឆ្លងក្នុងសហគមន៍ និងផ្សារភ្ជាប់គ្នាលើបញ្ហាប្រឈម របស់ជនចំណាកស្រុក ដែលរស់នៅជាមួយ អេដស៍ស្របទៅនឹងការយកចិត្តទុកដាក់របស់កាកបាទក្រហមកម្ពុជា និងការប្រឹងប្រែងរបស់រាជរដ្ឋាភិបាលកម្ពុជា ចំពោះជនចំណាកស្រុកដែលរស់នៅជាមួយមេរោគអេដស៍មានដូចជា សុខភាពការអប់រំ និងការទទួលបានសេវាសុខាភិបាល ចំពោះពួកគាត់ម្យ៉ាងវិញទៀតដែលមានការឧបត្ថម្ភគាំទ្រថវិកាពី កាកបាទក្រហមអ៊ីតាលីតាមរយៈសហព័ន្ធអន្តរជាតិ កាកបាទក្រហម និងអឌ្ឍចន្ទក្រហម និងជំនួយបច្ចេកទេសពីកាកបាទក្រហមកម្ពុជា បានធ្វើឲ្យសាខាកាកបាទក្រហមកម្ពុជាខេត្តបន្ទាយមានជ័យ មានលទ្ធភាពក្នុងការអនុវត្តដោយគម្រោងបានល្អប្រសើរ ប្រកបដោយការយកចិត្តទុកដាក់ខ្ពស់ ក្នុងការលើកកម្ពស់ការអប់រំផ្សព្វផ្សាយដល់ ជនចំណាកស្រុក ដែលរស់នៅជាមួយមេរោគអេដស៍ តាមគ្រប់រូបភាពបានយកចិត្តទុកដាក់ពីជីវភាពរស់នៅរបស់ពួកគាត់ តាមរយៈការចុះសួរសុខទុក្ខ និងផ្ដល់កញ្ចប់នៃការទ្រទ្រង់សុខភាពផងដែរ៕
