(ខេត្តបន្ទាយមានជ័យ) ព្រះមន្ត្រីសង្ឃខេត្ត ស្រុក ក្រុង និងមានការចូលរួម ពីសំណាក់ លោក យឹម សំណាង អភិបាលរងខេត្ត លោក បៀវ ថាន ប្រធានមន្ទីរធម្មការនិងសាសនាខេត្ត នារសៀលថ្ងៃទី១៨ ខែមិថុនា ឆ្នាំ២០២៤ បាននិមន្តនិងអញ្ជើញប្រគល់នូវសម្ភារៈជូនដល់ក្រុមគ្រូពេទ្យ និងបុគ្គលិកនៃមន្ទីរពេទ្យគន្ធៈបុប្ផា ក្នុងខេត្តសៀមរាប។
គោលបំណងនៃការចូលរួមឧបត្ថម្ភសម្ភារៈផ្សេងៗ ដល់មន្ទីរពេទ្យគន្ធៈបុប្ផាដើម្បីជួយសម្រាលបន្ទុក ដល់បងប្អូនប្រជាពលរដ្ឋ ដែលទៅសម្រាកព្យាបាលនៅមន្ទីរពេទ្យដោយសម្ភារៈដែលបានផ្តល់ក្នុងពេលនេះរួមមានកន្ទេលធំចំនួន ៤៨ កន្ទេលតូចចំនួន២៤៥ ខ្នេីយចំនួន ២០៧ ភួយចំនួន ១៨៤ សារុងចំនួន ២២ និងកន្សែងពោះគោចំនួន១០ ដោយសម្ភារៈទាំងអស់នេះ គឺមានសភាពថ្មីបានមកពីបណ្ដាវត្តផ្សេងៗ នៅក្នុងខេត្តតាមរយៈមន្ទីរធម្មការនិងសាសនាខេត្ត។
បើតាមប្រសាសន៍របស់ក្រុមគ្រូពេទ្យក៏ដូចជាបុគ្គលិកបានបញ្ជាក់ថាមន្ទីរពេទ្យ នៅខេត្តសៀមរាបគឺជាមន្ទីរពេទ្យមនុស្សធម៌ ព្យាបាលពុំគិតកម្រៃ ពីបងប្អូនប្រជាពលរដ្ឋមានជីវភាពខ្វះខាត មន្ទីរពេទ្យបានចេញថ្លៃសេវាផ្តល់ជាថវិកាមួយចំនួនទៀតដែលវិលត្រឡប់ទៅលំនៅឋានវិញ។
លោកគ្រូពេទ្យបានបន្តថា ជារៀងរាល់ថ្ងៃមន្ទីរពេទ្យគន្ធៈបុប្ផា បានដំណើរការមកដល់សព្វថ្ងៃនេះបានមកពី សប្បុរសជនក្នុងនិងក្រៅប្រទេស ដែលបានផ្តល់ថវិការួមជាមួយនឹងសម្ភារៈ ហេីយការចំណាយក្នុងមួយថ្ងៃមួយថ្ងៃ ប្រមាណជាមធ្យមរាប់សិបម៉ឺនដុល្លារសហរដ្ឋអាមេរិក ហេីយមន្ទីរពេទ្យគន្ធៈបុប្ផានៅតែរក្សាភាពដើម ការព្យាបាលជំងឺមិនយកកម្រៃនោះឡើយ។
លោកយឹម សំណាង អភិបាលរងខេត្តបានមានប្រសាសន៍ ថ្លែងនូវអំណរគុណចំពោះ ព្រះមន្ត្រីសង្ឃគ្រប់ឋានានុក្រម ដែលបានគឿងគរ ជាសម្ភារៈផ្សេងៗ មកប្រគល់ជូនដល់បងប្អូនដែលបានមកសម្រាកព្យាបាលនៅមន្ទីរពេទ្យគន្ធបុប្ផា។ ហើយនេះគឺសរបញ្ជាក់ឲ្យឃើញពីទឹកចិត្តទឹកប្រទ័យ ទាំងការយកចិត្តទុកដាក់ខ្មែរជួយខ្មែរ ខ្មែរស្រឡាញ់ខ្មែរ ក្នុងគ្រាលំបាក ហេីយនេះពិតជាមាន អត្ថន័យធំធេងណាស់ ហើយសង្ឃឹមថា នាឱកាសក្រោយទៀត នឹងបានមកផ្តល់ជាសម្ភារៈនេះជាបន្តទៀត៕
