(បន្ទាយមានជ័យ)៖នៅព្រឹកថ្ងៃទី២៨ ខែឧសភា ឆ្នាំ២០២៤ លោកឧត្តមសេនីយ៍ត្រី បោន ប៊ិន មេបញ្ជាការកងរាជអាវុធហត្ថខេត្តបន្ទាយមានជ័យ បានអញ្ជេីញជាអធិបតីក្នុងពិធីប្រកាសចូលកាន់មុខតំណែង ផ្ទេរភារកិច្ច និងបំពាក់ឋានន្តរសក្កិ ជូនយោធិន នៃកងរាជអាវុធហត្ថចំនួន៤៦រូប ក្នុងនោះ តម្លេីងឋានន្តរសក្កិចំនួន១៥រូប មានថ្នាក់អនុសេនីយ៍ឯក ចំនួន៦រូប , ថ្នាក់អនុសេនីយ៍ទោចំនួន៥រូប , នាយឯកចំនួន៤រូប។ តម្លេីងឋានន្តរសក្កិ និងផ្លាស់ភារកិច្ច ២៦នាក់ រួមមាន ថ្នាក់អនុសេនីយ៍ឯកចំនួន១៦រូប , ថ្នាក់អនុសេនីយ៍ត្រី ចំនួន១រូប, ថ្នាក់អនុសេនីយ៍ទោចំនួន៦រូប និងផ្ទេរភារកិច្ចចំនួន៥រូប។ ពិធីនេះបានធ្វើឡើងនៅសាលប្រជុំធំ ជាន់ទី២ អគារសេនាធិការដ្ឋាន កងរាជអាវុធហត្ថខេត្តបន្ទាយមានជ័យ ដោយមានការអញ្ជេីញចូលរួមពីលោកមេបញ្ជាការរង នាយសេនាធិការរង លោកប្រធានមន្ទីរទាំង៧ លោកមេបញ្ជាការមូលដ្ឋានកងរាជឣាវុធហត្ថក្រុង ស្រុក ទាំង៩ ព្រមទាំងនាយទាហាន នាយទាហានរង និងពលទាហាន នៃកងរាជឣាវុធហត្ថចូលរួមសរុបចំនួន២៣៣នាក់ផងដែរ ។
នាឱកាសនោះដែរលោកឧត្តមសេនីយ៍ត្រី បោន ប៊ិន មេបញ្ជាការកងរាជាអាវុធហត្ថខេត្ត ក៏បានពាំនាំនូវប្រសាសន៍សួរសុខទុក្ខ ពីសំណាក់លោកនាយឧត្តមសេនីយ៍ សៅ សុខា អគ្គមេបញ្ជាការរង នៃកងយោធពលខេមរភូមិន្ទ មេបញ្ជាការកងរាជអាវុធហត្ថលើផ្ទៃប្រទេស ដល់នាយទាហាន នាយទាហានរង និងពលទាហាន នៃកងរាជអាវុធហត្ថទាំងអស់ដោយក្តីនឹករលឹកផងដែរ។
ក្នុងនោះដែរលោកឧត្តមសេនីយ៍ត្រី បោន ប៊ិន ក៏បានថ្លែងនូវការកោតសរសើរ ដល់កងកម្លាំងកងរាជអាវុធហត្ថទាំងឣស់ដែលកន្លងមកបានចូលរួមសហការយ៉ាងសកម្មជាមួយអាជ្ញាធរគ្រប់លំដាប់ថ្នាក់ ក្នុងការជួយដល់ប្រជាពលរដ្ឋរងគ្រោះដោយគ្រោះធម្មជាតិផ្សេងៗ។ ក្នុងស្មារតីនេះ លោកឧត្តមសេនីយ៍ត្រី មេបញ្ជាការកងរាជអាវុធហត្ថខេត្ត ក៏ស្នើឱ្យកងកម្លាំងកងរាជអាវុធហត្ថទាំងអស់ បន្តនូវស្មារតីគោរពស្រឡាញ់ការពារជាតិ ការពារសាសនា និងព្រះមហាក្សត្រនៃយើង ត្រូវរួមគ្នាការពារសន្តិភាព ត្រូវបន្តពង្រឹង និងពង្រីកកិច្ចការទាំងអស់ ដែលយើងសម្រេចបាន ដើម្បីបន្តកសាងប្រទេសជាតិឱ្យកាន់តែមានវឌ្ឍនភាព និងភាពរីកចម្រើនរុងរឿងបន្ថែមទៀត។
ជាងនេះទៅទៀតលោកឧត្តមសេនីយ៍ត្រី បោន ប៊ិន ក៏បានផ្សព្ធផ្សាយសេចក្ដីណែនាំ ឯកឧត្ដម នាយឧត្ដមសេនីយ៍ វង្ស ពិសេន ឣគ្គមេបញ្ជាការនៃកងយោធពលខេមរភូមិន្ទ ដល់នាយទាហាន នាយទាហានរង និងពលទាហាន នៃកងរាជឣាវុធហត្ថផងដែរ៕
