បន្ទាយមានជ័យ៖ សាលារៀនបឋមសិក្សា ហ៊ុន សែន វត្តថ្មី ក្រោយពីចាស់ទ្រុឌទ្រោម ត្រូវបានបើកកិច្ចភិក្សារៀបចំសាងសង់ថ្មីដែលជាអំណោយដ៏ថ្លៃថ្លារបស់សម្តេចតេជោ ហ៊ុនសែន ដែលរៀបចំកិច្ចប្រជុំភិក្សាការងារសាងសង់សំណង់ ក្រោមព្រះធិបតីភាព ព្រះឧត្តមសីលញាណ ធុល សុធា ព្រះមេគណខេត្តបន្ទាយមានជ័យ នៅរសៀលថ្ងៃទី២៤ ខែឧសភា ឆ្នាំ២០២៤ នៅវត្តសុរិយារាម(វត្តថ្មី) ក្នុងភូមិបាលិលេយ្យ១ សង្កាត់ប៉ោយប៉ែត ក្រុងប៉ោយប៉ែត។
ព្រះគ្រូឃោសាភិសិរី ឌួង រដ្ឋា ព្រះវិន័យធរអនុគណក្រុងប៉ោយប៉ែតនិងជាព្រះគ្រូចៅអធិការវត្តសុរិយារាម(វត្តថ្មី)បានមានសង្ឃដីកាថា៖ បន្ទាប់ពីបានឃើញគម្រោងនៃការសាងសង់របស់សាលាបឋមសិក្សា ហ៊ុន សែនវត្តថ្មីហើយ ព្រះអង្គសុំឲ្យមានការកែប្រែចំនួន៣ចំណុច ទី១.ការសាងសង់របងសាលាព័ន្ធជុំវិញ សុំកុំឲ្យមាន ព្រោះសាលានៅក្នុងបរិវេនវត្តសុំធ្វើតែរបងវត្តព័ន្ធជុំវិញជាការស្រេច។ ទី២.ទាក់ទងនិងការចាក់ដីនៅក្នុងសាលាសុំឲ្យស្មើនឹងដីបរិវេណវត្តផងដែរដើម្បីសោភ័ណភាពវត្តរួមទាំងភាពស្រស់ស្អាតរបស់សាលាផងដែរ និងទី៣. សុំធ្វើសួនច្បារតាមប្លង់បែបវត្តដែលមានក្នុងគម្រោងវត្តស្រាប់តែម្តង។
លោក លោភ លន ចៅសង្កាត់ប៉ោយប៉ែត បានបញ្ជាក់ថា៖ សាលារៀនបឋមសិក្សា ហ៊ុន សែន វត្តថ្មីនេះ ត្រូវបានចាស់ទ្រុឌទ្រោម ហើយត្រូវសាងសង់ថ្មីមានចំនួន២អគារ អគារទីចាត់ការ១ខ្នង និងអគារសិក្សា១ខ្នង មាន៥បន្ទប់ ត្រូវចាក់ដី រៀបចំសួន ចាក់បេតុង និងរៀបចំកសាងសមទ្ធិផលផ្សេងៗ សរុបជាង១០ម៉ឺនដុល្លារអាមេរិក ដែលជាអំណោយដ៏ថ្លៃថ្លារបស់សម្តេចតេជោ ហ៊ុន សែន។ ចំពោះការស្នើសុំឲ្យមានកែប្រែចំណុចមួយចំនួនខាងលើនេះ លោកនឹងរាយការណ៍ជូនថ្នាក់លើបន្តទៀត។
ព្រះឧត្តមសីលញាណ ធុល សុធា ព្រះមេគណខេត្តបន្ទាយមានជ័យមានសង្ឃដិកាបញ្ជាក់ថា៖ កិច្ចភិក្សាខាងលើនេះ គឺកិច្ចភិក្សារួមគ្នា ដើម្បីគាំទ្រលើការសាងសង់សាលារៀន ដើម្បីជាប្រយោជន៍រួម និងធ្វើការកែតម្រូវចំណុចខ្លះៗ ដើម្បីឲ្យត្រូវគោលច្បាប់នៃការសាងសង់សាលារៀននៅក្នុងទីវត្តអារាម គឺមិនអាចធ្វើរបងសាលាហ៊ុំព័ន្ធដាច់ដោយឡែកបានទេ ព្រោះសាលារៀន ដែលនៅក្នុងវត្តអារាម វាស្ថិតនៅក្រោមការគ្រប់គ្រងរបស់វត្ត។ សុំធ្វើយ៉ាងណាជួបភិក្សាការងារគ្នាសិន ទាំងព្រះគ្រូចៅអធិការគ្រប់គ្រងវត្ត អាជ្ញាធរ មន្ត្រីជំនាញពាក់ព័ន្ធ ដើម្បីការងារសាងសង់សាលារៀនរលូតបានងាយស្រួលនិងឆាប់រហ័ស។
គួរបញ្ជាក់ថា៖ កិច្ចភិក្សាខាងលើនេះ ប្រកបដោយភាពរលូន និងឯកភាពគ្នា ចុះពិនិត្យទីតាំងជាក់ស្តែង ដើម្បីសិក្សាស្វែងយល់បន្តរកដំណោះស្រាយរួមមួយ និងលទ្ធផលផ្លែផ្លាល្អ ប្រកបដោយភាពសប្បាយរីករាយ៕
