(បន្ទាយមានជ័យ)ឯកឧត្តម អ៊ុំ រាត្រី អភិបាល នៃគណៈអភិបាលខេត្តបន្ទាយមានជ័យ នាសៀលថ្ងៃទី២ ខែមេសា ឆ្នាំ២០២៤ បានដឹកនាំកិច្ចប្រជុំគណ:បញ្ជាការឯកភាពរដ្ឋបាលខេត្ត និងប្រជុំត្រួតពិនិត្យវឌ្ឍនភាពការងារគណៈកម្មការរៀបចំកម្មវិធី“សង្ក្រាន្តបន្ទាយមានជ័យ“ឆ្នាំ២០២៤ ដើម្បីអបអរសាទរពិធីបុណ្យចូលឆ្នាំថ្មីប្រពៃណីជាតិខ្មែរ។ កិច្ចប្រជុំនេះបានធ្វើនៅសាលប្រជុំសាលាខេត្តបន្ទាយមានជ័យ ដោយមានការចូលរួមពីលោក លោកស្រី គណអភិបាលរងខេត្ត អភិបាល.អភិបាលរងក្រុង ស្រុក មន្ទីរអង្គភាពពាក់ព័ន្ធ និងកងកម្លាំងទាំងបី។
ឯកឧត្តម អ៊ុុុំ រាត្រី អភិបាលខេត្តបន្ទាយមានជ័យ បានមានប្រសាសន៍លើកឡើងថា៖កិច្ចប្រជុំនៅពេលនេះក្នុងគោលបំណង៖ ១,ត្រួតពិនិត្យវឌ្ឍនភាពការងារគណៈកម្មការរៀបចំកម្មវិធី“សង្ក្រាន្តបន្ទាយមានជ័យ“ឆ្នាំ២០២៤ ដើម្បីអបអរសាទរពិធីបុណ្យចូលឆ្នាំថ្មីប្រពៃណីជាតិខ្មែរ ឆ្នាំរោង ឆស័ក ព.ស ២៥៦៨ គ.ស២០២៤។២,ការពង្រឹងប្រសិទ្ធភាពការងារគណៈបញ្ជាការឯកភាពរដ្ឋបាលខេត្ត ក្រុង ស្រុក។
ឯកឧត្តម បានបញ្ជាក់ថា៖ក្រោមការដឹកនាំដ៏ត្រឹមត្រូវប្រកបដោយថាមពលស្វាហាប់ឈ្លាសវៃនិងប៉ិនប្រសប់របស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា រាជរដ្ឋាភិបាលកម្ពុជា បាននឹងកំពុងបន្តពង្រឹងខឿនសន្តិសុខសណ្ដាប់ធ្នាប់សាធារណៈ ការអភិវឌ្ឍន៍សង្គមសេដ្ឋកិច្ច និងកំណែទម្រង់មុតស្រួច និងស៊ីជម្រៅដើម្បីបុព្វហេតុជាតិមាតុភូមិនិងប្រជាជន។
ឯកឧត្តមបានបន្តបញ្ជាក់ថា៖ លោក លោកស្រី គណអភិបាលរងខេត្ត អភិបាល.អភិបាលរងក្រុង ស្រុក មន្ទីរអង្គភាពពាក់ព័ន្ធ និងកងកម្លាំងទាំងបី ត្រូវចូលរួមអនុវត្តទៅតាមតួនាទី ភារកិច្ច ការទទួលខុសត្រូវនិងរបៀបរបបការងារដូចបានកំណត់ ដើម្បីជាការចូលរួមការពារសន្តិសុខ សណ្ដាប់ធ្នាប់ ជូនបងប្អូនប្រជាពលរដ្ឋនៅក្នុងឱកាសចូលឆ្នាំថ្មីប្រពៃណីជាតិខ្មែរ ឆ្នាំរោង ឆស័ក ព.ស ២៥៦៨ គ.ស២០២៤ខាងមុខនេះ។ជាពិសេសសម្រាប់ក្នុងឱកាសបុណ្យចូលឆ្នាំប្រពៃណីជាតិខ្មែរមុខនេះ យើងត្រូវបញ្ឈប់ការរាំសប្បាយនៅតាមបណ្ដាវត្តអារាមឬទីកន្លែងកំសាន្តនានា។ទាំងអស់ទូទាំងខេត្តបន្ទាយមានជ័យយ៉ាងយូរបំផុតជាកំហិតបញ្ចប់នៅម៉ោង១១:០០យប់ថ្ងៃទី២១ ខែមេសា ឆ្នាំ២០២៤នេះ ។
បន្ទាប់ពីបញ្ចប់នៅកិច្ចប្រជុំគណៈបញ្ជាការឯកភាពខេត្តរួចមក ឯកឧត្តម អ៊ុំ រាត្រី អភិបាល នៃគណៈអភិបាលខេត្តបន្ទាយមានជ័យ លោក ហុឹល រ៉ាយ៉ា អភិបាលរងខេត្ត និងលោកអភិបាលរងក្រុង លោក.លោកស្រីប្រធាន.អនុប្រធានមន្ទីរអង្គភាព និងកងកម្លាំង បានបន្តអញ្ជើញចុះពិនិត្យ និងរៀបចំប្រព័ន្ធបាញ់ទឹកសម្រាប់សង្រ្កាន្តបន្ទាយមានជ័យ ស្ថិតនៅបរិវេណសួនតេជោឈ្នះឈ្នះ(វេទិកាខេត្ត) ដើម្បីត្រៀមទុកជូនដល់យុវជន យុវតី អុំ ពូ មីង ពុក ម៉ែ បងប្អូនប្រជាពលរដ្ឋ បានចូលរួមកំសាន្តសប្បាយ ក្នុងឱកាសអបអរសាទរ ពិធីបុណ្យចូលឆ្នាំថ្មីប្រពៃណីជាតិខ្មែរ ឆ្នាំរោង ឆស័ក ព.ស ២៥៦៨ គ.ស២០២៤ នាថ្ងៃទី១៣.១៤.១៥.១៦ ខែមេសា ២០២៤ខាងមុខនេះផងដែរ៕
