ខេត្តបន្ទាយមានជ័យ៖ថ្លែងក្នុងពិធីបុណ្យកាត់ប្ញសសីមា សម្ពោធឆ្លងសមិទ្ធផលនានាក្នុងវត្តរតនបល្ល័ង្គមង្គល ស្ថិតនៅភូមិបល្ល័ង្គ ឃុំតាគង់ ស្រុកម៉ាឡៃ ខេត្តបន្ទាយមានជ័យ ដោយមានការចូលរួមពីអាជ្ញាធរមូលដ្ឋាន ឃុំ ស្រុក ព្រះសង្ឈ តាជី យាយជី ប្រជាពលរដ្ឋ សិស្សានុស្ស យ៉ាងច្រើនកុះករ ហើយពិធីបុណ្យចូលឆ្នាំប្រពៃណីជាតិខ្មែរក៏គៀកមកដែរនោះ លោក ឈឿន ក្រៃយ៉ុង អភិបាលរង ខេត្តបន្ទាយមានជ័យ បានធ្វើការអំពាវនាវដល់បងប្អូនប្រជាពលរដ្ឋ សូមបន្តរក្សារនូវប្រពៃណី ទំនៀមទំលាប់ដ៏ល្អដែលបានបន្សល់ពីដូនតារៀងមក និងសូមរួបរួមសាមគ្គីគ្នាក្នុងការចូលរួមកសាង និងអភិវឌ្ឍទីអារាម ក្នុងវិស័យព្រះពុទ្ធសាសនា ឲ្យកាន់តែរីកចម្រើនតទៅទៀតផងដែរ។
លោក ឈឿន ក្រៃយ៉ុង បន្តថា៖ក្នុងរយៈពេល៣ឆ្នាំ ៨ខែ និង២០ថ្ងៃ ក្នុងរបបបនប្រល័យពូជសាសន៍ប៉ុល ពត ទំនៀមទំលាប់វប្បធម៌ វត្តអារាមត្រូវបានបំផ្លាញទាំងស្រុង ប្រជាពលរដ្ឋរស់នៅក្នុងការភ័យខ្លាច ។ ក្រោយថ្ងៃរំដោះ ៧មករា ១៩៧៩ ជាថ្ងៃផ្តួលរំលំរបបប្រល័យពូជសាសន៍ប៉ុល ពត យើងបានរួបរួមស្តារប្រទេសជាតិឡើងវិញ ពីបាតដៃទទេ ដោយឆ្លងកាត់ការលំបាករាប់ម៉ឺនជំពូក ឧបស័គ្គតូចធំជាច្រើនក្នុងសម័យសង្រ្គាមស៊ីវិលដ៏រ៉ាំរ៉ៃជាច្រើន ទស្សវត្ស ។ ក្រោយបញ្ចប់សង្រ្គាមទាំងស្រុងក្នុងអំឡុងឆ្នាំ១៩៩៨ ក្រោមគោលនយោបាយឈ្នះ ឈ្នះ របស់សម្តេចតេជោ ហ៊ុន សែន ដែលជាមទ្ទេសក៏ឯក បានធ្វើឲ្យដួងព្រលឹងជាតិខ្មែរខាងជំនឿសាសនា មានការរស់រានឡើងវិញយ៉ាងឆាប់រហ័ស ជាក់ស្តែងនៅក្នុងតំបន់នេះ អតីតជាកន្លែងសមរភូមិក្តៅ បច្ចុប្បន្នជាទីអារាម ជាទីសក្ការៈរបស់ពុទ្ធបរិស័ទគោរពនិងព្រះវិហារដែលត្រូវបានសម្ពោធនាថ្ងៃនេះ ក្រោមម្លប់នៃសន្តិភាពយើងអាចអភិវឌ្ឍលើគ្រប់វិស័យទាំងពុទ្ធចក្រនិងអាណាចក្រ ។
លោកអភិបាលរង បានបន្តថា៖ក្នុងនាមរដ្ឋបាលខេត្ត សូមថ្លែងអំណរគុណដល់ព្រះសង្ឃគ្រប់ព្រះអង្គ បងប្អូនពុទ្ធបរិស័ទជិត ឆ្ងាយ ទាំងអស់ដែលបានចូលរួមថែរក្សាសន្តិភាព តាមរយៈនៃការសម្រេចចិត្តផ្តល់សម្លេងឆ្នោតជ្រើរើសតំណាងរាស្ត្រនីតិកាលទី៧ នៃរដ្ឋសភា ដែលមានសម្តេចបវរធិបតី ហ៊ុន ម៉ាណែត ជានាយករដ្ឋមន្ត្រី ដែលជាថ្នាក់ដឹកនាំពោរពេញដោយការប្តេជ្ញាចិត្តខ្ពស់ក្នុងការធានានូវសុខសន្តិភាព និងការអភិវឌ្ឍប្រកបដោយដោយស្ថិរភាពជូនជាតិមាតុភូមិ ។
ជាចុងបញ្ចប់លោក អភិបាលរង បានណែនាំឲ្យគ្រប់វត្តអារាម នៅតែបន្តដើរតួនាទីជាន្លែងអប់រំសីលធម៌ ចរិយាធម៌ គុណធម៌ សុវជីធម៌ និង ជាកន្លែងដែលរក្សាទុកនូវវប្បធម៌ ប្រពៃណី ទំនាមទំលាប់ ដែលបុព្ធបុរសខ្មែរយើងបានបន្សល់ត្រួសត្រាយទុកពីជំនាន់មួយទៅជំនាន់មួយសម្រាប់មនុស្សជំនាន់ក្រោយ ពិសេសទៀតទីវត្តអារាមជាកន្លែងបណ្តុះធនធានមនុស្សពោរពេញទៅដោយចំណេះដឹង ទាំងផ្លូវលោកនិងផ្លូវធម៌ ប្រកបដោយមនសិការជាតិ ត្រូវចូលរួមឲ្យបានខ្លាំងក្លាក្នុងការកាត់បន្ថយនូវអំពើអកុសល់ អបាយមុខផ្សេងៗ ដូចជា ល្បែងស៊ីសង បញ្ហាគ្រឿងញៀន បញ្ហាគ្រោះថ្នាក់ចរាចរណ៍ តាមរយៈសារអប់រំទូន្មានប្រៀនប្រដៅតាមឱវាទព្រះពុទ្ធ ដើម្បីលុបបំបាត់នូវអំពើអកុសលដែលំពុងប្រឈមដល់សង្គមយើងនាពេលបច្ចប្បន្ន ។មួយវិញទៀតគឺសូមបងប្អូនប្រជាពលរដ្ឋចូលរួមអនុវត្តគោលនយោបាយភូមិ ឃុំ សង្កាត់មានសុវរត្ថិភាពទាំងអស់គ្នា និងប្អូនៗ ក្មួយៗសិស្សានុសិស្សទាំងអស់ដែលជាទំពាំងស្នងប្ញស្សី ត្រូវខិតខំរៀនសូត្រនិងត្រូវនៅឲ្យឆ្ងាយពីគ្រឿងញៀន ។បន្ទាប់មកគណៈអធិបតីបានប្រគេននិងប្រគល់ប័ណ្ណសរសើរជូនដល់សប្បរសជន និងចែកអំណោយតាជី យាយជី លោកគ្រូ អ្នកគ្រូ សិស្សានុសិស្ស ជានិមិត្តរូបនិងកាត់ប្ញសសីមាផងដែរ ៕
