ខេត្តបន្ទាយមានជ័យ៖ដោយអនុវត្តតាមបទបញ្ជារបស់លោកឧត្តមសេនីយ៍ទោ សិទ្ធិ ឡោះ ស្នងការ នៃស្នងការដ្ឋាននគរបាលខេត្តបន្ទាយមានជ័យ និងមានការណែនាំពីលោកវរសេនីយ៍ឯក ហាំ វណ្ណៈ មេបញ្ជាការ វរសេនាតូចនគរបាលការពារព្រំដែនគោកលេខ៨៩១ នៅវេលារំលងអាធ្រាតឈានចូលថ្ងៃទី១០ ខែមីនា ឆ្នាំ២០២៤ កម្លាំងអន្តរាគមន៍វរៈ៨៩១ ចំនួន ១០នាក់ ដឹកនាំដោយលោក វរសេនីយ៍ទោ ណុល ម៉ាប់ មេបញ្ជាការរង និងជាប្រធានវេនប្រចាំបញ្ជាក្រុមទី៣ បានចុះធ្វើការល្បាតចល័ត ដើម្បីរក្សាការពារសន្តិសុខ សុវត្ថិភាពជូនប្រជាពលរដ្ឋ ពេលយប់លើភូមិសាស្រ្តរដ្ឋបាលសង្កាត់ផ្សារកណ្តាល និងសង្កាត់អូរឫស្សី ក្រុងប៉ោយប៉ែត ក៏បានប្រទះឃើញក្មេងទំនើងមួយក្រុមមានគ្នាបីនាក់ធ្វើសកម្មភាពបទល្មើសជាក់ស្តែងចែកចាយគ្រឿងញៀន ភ្លាមនោះកម្លាំងបានធ្វើការឃាត់ខ្លួនយកទៅធ្វើការសាកសួរ។
នគរបាលបានឲ្យដឹងថា ការឃាត់ខ្លួនជនសង្ស័យនេះបានធ្វើឡើងនៅចំណុចរង្វង់មូលបុរី KN ជាប់ផ្លូវជាតិលេខ៥ ជិតសួនច្បារតេជោឈ្នះឈ្នះ ក្រុងប៉ោយប៉ែត ស្ថិតក្នុងភូមិគីឡូម៉ែត្រ៤ សង្កាត់ផ្សារកណ្តាល ក្រុងប៉ោយប៉ែត ដោយជនសង្ស័យទី១–ឈ្មោះ សឿម សំណាង ភេទប្រុស អាយុ ១៨ ឆ្នាំជនជាតិខ្មែរ។
ទី២–ឈ្មោះ គ្រី តុលា ភេទប្រុស អាយុ ២៤ ឆ្នាំជនជាតិខ្មែរ ។
ទី៣–ឈ្មោះ វ៉ុន សុខឃាង ភេទប្រុស អាយុ ១៨ ឆ្នាំ ជនជាតិខ្មែរ។ ហូតវត្ថុតាងដកហូតបានរួមមាន៖ម៉្សៅសក្រាមថ្លាសង្ស័យជាសារធាតុញៀន៤ កញ្ចប់តូច ,ទូរស័ព្ទចំនួន ៣ គ្រឿង ,កាំបិតតាំងតោចំនួន ១ , វិទ្យុទាក់ទង់ម៉ាក MEGABAND ចំនួន ១ គ្រឿង ,ម៉ូតូចំនួន ២ គ្រឿង (ម៉ាក MSX ១ គ្រឿង និងម៉ូតូម៉ាក honda dream ចំនួន ១ គ្រឿង ,កូនសោលេខ១៤ មួយ ដើម ,ដែកកេះ ២ ,ឆ្នាំងសាកទូរស័ព្ទ ១ និងឧបករណ៍សម្រាប់ប្រើប្រាស់គ្រឿងញៀន(បំពង់កែវមួយ) ។
នគរបាល បញ្ជាក់ថា ជនសង្ស័យប្រុសទាំង ៣នាក់ រួមទាំងវត្ថុតាងទាំងអស់ខាងលើ តូ្រវបានបញ្ជូនទៅសមត្ថកិច្ចជំនាញនគរបាលផ្នែកប្រឆាំងគ្រឿងញៀន នឹងផ្នែកព្រហ្មទណ្ឌនៃអធិការដ្ឋាននគរបាលក្រុងប៉ោយប៉ែតនៅវេលាម៉ោង ០១នឹង៤០នាទីរំលងអាធ្រាតនៅថ្ងៃទី១០ ខែមីនា ដើម្បីបន្តអនុវត្តតាមនីតិវិធី ៕
