បន្ទាយមានជ័យ៖ អាជ្ញាធរចុះអន្តរាគមន៍ពន្លត់ភ្លើងឆេះស្រូវជិតប្រមូលផលរបស់ប្រជាកសិករអស់ប្រមាណ៤ហិកតា នៅវេលាម៉ោង១០និង៣០នាទី ព្រឹកថ្ងៃទី១៦ ខែធ្នូ ឆ្នាំ២០២៤ នៅក្នុងភូមិកូនដំរី សង្កាត់និមិត្ត ក្រុងប៉ោយប៉ែត ខេត្តបន្ទាយមានជ័យ។
លោក ខាត់ ធា ចៅសង្កាត់និមិត្ត បានឲ្យដឹងថា៖ នៅពេលទទួលបានព័ត៌មាន ថាមានភ្លើងឆេះស្រូវប្រជាពលរដ្ឋ លោក គាត ហ៊ុល អភិបាលក្រុងប៉ោយប៉ែត បានចាត់ឲ្យមន្ត្រី សហការជាមួយក្រុមការងារសង្កាត់និមិត្ត និងកម្លាំងនគរបាលក្រុងប៉ោយប៉ែត ចុះអន្តរាគមន៍ជួយពន្លត់អគ្គីភ័យដែលកំពុងរៀលឆេះស្រូវប្រជាកសិករ ដោយកាច់មេឃឈើវាយពន្លត់ ប្រើត្រាក់ទ័រឈូសផ្តាច់មុខភ្លើងចំនួន២គ្រឿង, ត្រូន ស្តុកទឹកពន្លត់ពីលើអាកាស១គ្រឿង, រថយន្តពន្លត់អគ្គីភ័យរបស់រដ្ឋបាលក្រុង១គ្រឿង និងរថយន្តពន្លត់អគ្គីភ័យអធិការក្រុង១គ្រឿង ហើយអគ្គីភ័យត្រូវពន្លត់ទាំងស្រុង នៅវេលាម៉ោង ១១,១៥ នាទី ថ្ងៃដដែលនេះ។
លោក ខាត់ ធា បញ្ជាក់ថា៖ បើតាមប្រភពពីប្រជាពលរដ្ឋនៅកន្លែងកើតហេតុមូលហេតុដែលឆាបឆេះនេះ បង្កឡើងដោយមានអ្នកដុត កញ្ជាំងស្រូវ នៅពេលដែលភ្លើងឆេះខ្លាំងមានខ្យល់ខ្លាំង ទើបឆេះរាលដាលដល់ស្រូវរបស់ប្រជាកសិករដែលទុំបម្រុងប្រមូលផលអស់ប្រមាណ៤ហិកតា៕
